Senin, 4 Juni 2012 – 07:25 WITA Telah dibaca 1025 kali

Artikel Bahasa Manado

Berkat Atau Kutuk Versi Kum Tua

Oleh: Grasia Putri M-R

Di salah satu pulau di Sulawesi Utara ada beberapa kampung di sana. Kong ada yang depe nama Kampung Islam deng ada yang depe nama Kampung Kristen. Ternyata ada yang nyanda suka kalo itu kampung beda agama cuma mo hidup sanang deng rukun-rukun.

Satu hari ada orang pi bilang pa orang-orang di Kampung Islam kalo itu KampungKristen mo datang menyerang. Untung itu pemimpin di Kampung Islam batamang deng itu pemimpin di Kampung Kristen. Kong dia suru depe orang kepercayaan pi ba tanya pa pemimpin di Kampung Kristen. Itu pemimpin di Kampung Kristen kage deng heran kong bilang pa itu utusan dari Kampung Islam kalo itu pemimpin deng masyarakat di Kampung Kristen nyanda parna ada rencana mo ba serang pa pemimpin deng masyarakat Kampung Islam.

Syukurlah itu pemimpin di Kampung Islam nyanda talinga tipis kong gampang terprovokasi. Dia ambe waktu for pi cek itu kebenaran berita pa orang yang tepat. Jadi dia bawa berkat pa depe rakyat karena tindakan yang kirim utusan kong tau persoalan yang butul dia bole lindungi itu dua kampung dari bakalae kong bole mo ada korban dari cuma luka sampe ada yang meninggal. Itu bilang pemimpin bukang buta-buta langsung parcaya orang pe mulu-mulu. Mar pi cek pa yang bersangkutan depe kebenaran.

Depe kesimpulan setiap orang termasuk pemimpin ada dua pilihan, bole jadi berkat atau jadi kutuk for depe orang-orang di sekitar pa dia atau orang orang yang dia pimpin. Sala-sala, masak kata tanam rica kong mo baharap babua apel tantu nyanda mungkin toh. Yang pasti sapa yang menabur berkat mo tuai berkat bukang depe tabobale. Kong itu ada tabur yang mo pete depe hasil itu orang yang ada tabur deng depe keturunan no. epm.